2006/12/30

حجاج موديل 2007

العيد فرحه يا بني آدمين
كل سنه و انتو طيبين
---------------------
الحاج أحمد الصباحي
اول الحجاج اللي هكتب عنهم النهاره ..بصراحه مقدرتش امسك نفسي من الضحك وانا بقرأ حواره في المصري اليوم .. يمكن عشان كشفلي حاجات كتير و فسرلي تصرفات ياما ... مثلا اكتشفت اني مدين باعتذار قوي لوزير الداخليه و ضباطها و عساكرها نفر نفر على اتهامي لهم بالوقوف وراء احداث التحرش في الصحفيات في الثلاثاء الاسود .. قالوا ان العساكر همه اللي تحرشوا بيهم و خلعوا عنهم ملابسهم .. زي ما قالوا ان الامن سكت ايام تحرشات عيد الفطر
طلع السبب الحقيقي ان دي اوامر عليا .. الريس يا جماعه بيحب التغيير .. و طلع ان ده .. بيبسطوا .. يحب الناس تقلع و تلبس ..بمزاجه خالص .. و لو مش مصدق اقرأ الحوار اللي في الصور
طلع برضه ان المرشح الحقيقي لخلافه الريس ..بعد عمر طويل .. مش جمال مبارك ..لأ لأ .. طلعتوا فاهمين غلط ..طلع المرشح الحقيقي هو وزير الخارجيه ابو الغيط .. مش مصدقني .. مفاجأه صح ؟؟ .. بس الحاج صباحي قال كده . قال انه عايز الريس مبارك يمسك الحكم مدى الحياه لأنه بيسافر كتير .. فمين يا ترى هيسافر اكتر من وزير خارجيتنا المحترم
طلع برضه ..

-----------------------

الحاج سليمان
-
زجل .. زجله و دونه .. طنطاوي
-
عم سليمان
مصري أصيل .. زي التاريخ ما قال زمان
عايش حياته .. يوم ب يوم
ولا عمره طقــّم في الهدوم
مش قلتلك .. مصري اصيل
يعني بيرضى بالقليل
راضي و حاسس بالامان
عم سليمان
عنده البنات زي البنين
يجوع .. و همه شبعانين
عمره ما قال .. آن الاوان
اسرق و اعيش زي الحيتان
مش قلتلك .. مصري اصيل
عايش يا دوبك بالقليل
عم سليمان
م الساعه خمسه يفوق قوام
ماهو ده الآدان
يقوم يصلي ويدعى ربه
ويجري يطلع ع الميدان
ما هو اصل كشكه هناك تمام
بيبيع سجاير فرط
شوكلاته و لبان
عم سليمان واقف في يوم
ماسك في ايده سندوتش
قرديحي طبعا ..متحاولش
الفول غلي
حتى البيضايه تخاف تحطها تستوي
لحسن تبوش و تختفي
فجأه طلعله هيلمان
ضابط و عسكر دادابان
قالو .. يالا يا عمنا
اقفل و غور عن وشنا
موكب سيادته معدي حالا من هنا
قاله .. يا باشا .. انا سليمان
في الحته ديه من زمان
ولاعمري مره قفلت كشكي مهما كان
بإشاره واحده الكشك كان ملوش وجود
و عمنا أخدوه بعيد عند الحدود
حتى السجاير و اللبان
بقت بتجري بين السنان
نهشوها .. و اخلو المكان
عم سليمان
غاب غيبه عنا .. طولت
و ولاده بدري .. اتيتمت
و الناس عليه .. اتكلمت
قالوا الغلط .. عليه كبير
طول عمره ساكت
همه كله .. كان في بير
رغم انه كان فقير
جاي دلوقتي يفوق
بعد الآوان
جـّـي يعمل فيها راجل
بعد شيبته و شعره الابيض لما بان
عم سليمان
رجع في يوم مكسور حزين
قفاه طول
مش زي ما كان
عليه آثار .. ايد السجان
نده علينا .. و قال بردان
قام عم جرجس .. جابله عبايه
و الست زينب .. جابت الشاي
عم سليمان
كان كل همه يعيش لولاده
ولا عمره قال كلمه تعبان
كافي خيره شره
و ان حد ضره
بطباعه هوه يكون كسبان
و بدون خناقه
و زعيق و غاغه
عمرك ما كنت تشوفه جبان
و ده كان زمان
حرموه يعيش بني آدم تاني
استكتروا انه يكون انسان
-----------------
الحاج الخواجه
-
في احد محاضرات الجراحه اللذيذه حكلنا دكتور جراحه تجميل عن صديق فرنساوي جه يزور مصر .. و لما اخده و نزل بيه الحتت الشعبيه .. الراجل كان مستغرب جدا .. و قاله ملاحظتين يفطسوا من الضحك .. بيقولو .. هوه ليه الناس في مصر بتحط العيش بعد ما تجيبه من الفرن على الارض .. مع انهم حاطين الجزم .. في فاترينات ازاز
و قاله .. مش غريبه ان الرجاله عندكو يسيبوا الستات و يبوسو بعض كل لما واحد يقابل واحد صحابه في الشارع او كده
شفتوا احنا متخلفين ازاي هههههه
--------------------
الحاج مفيد شهاب
-
النهارده الوقفه .. و المفروض اني بذاكر .. لكن الساعه 3 العصر كده حسيت بزهق فظيع ف قلت اقلب في التلفزيون .. المفروض الناس دلوقتي يا إما مشغوله ب روبي و رولا و هيفا .. و رجب اللي حارق دم شباب البلد ... و يا إما مشغولين بمتابعه قناه الجزيره و اخبار اعدام صدام و الخلافات الصوماليه .. و يا إما بقه جايبين مالآخر و فاتحين على اي قناه جايبه بث حي من عرفات و قاعدين يتفرجوا على الحجيج زيي و يتحسروا و يقولو .. يارتنا كنا معاهم
انا قلت اطلع من كل ده و ادخل على قناه اقرأ .. يمكن الاقي فيها حد من الناس اللي بحبهم .. قوم ايه يا عم الحج .. الاقيلك الحاج مفيد شهاب .. قصدي معالي الوزير مفيد شهاب .. كان قاعد .. على نفسي .. في قناه إقرأ .. لابس ابيض في ابيض و وشه منور ماشاء الله .. و في حوار ساخن مع مذيع سعودي .. بصراحه الراجل السعودي سلخه .. تحس انه بيطلع فيه غل 70 مليون مواطن مصري .. و الاحلى بقه انه كان بيديله كل سؤال و سؤال من تحت لتحت .. و عمك مفيد مصر يتكلم باللغه العربيه زيه .. و عمال يقول كلام كبير عن الأمه الاسلاميه و العربيه .. و النعمه انا افتكرته بقه مرشد الاخوان المسلمين هههههه
اجزاء من كلام الدكتور مفيد شهاب في هذا الحوار .. و الله العظيم هوه قال كده
ـ من رآى منكم منكرا فليغيره .. فلا يجب ان نسكت على فساد هنا أو هناك حتى تنصلح الامه الاسلاميه جميعا
ـ كما تكونوا يولى عليكم .. فإذا قالوا ان هناك خطأ .. فالسبب ان هذا المحكوم لم يقوم حاكمه
-

--------------------------

كل عام و انتم بخير

Image Hosted by ImageShack.us

8 comments:

Nouran said...

بص يا باشا انا ملحقتش اقرا البوست انا معدية اقولك كل سنة وانت طيب
كل سنة وانت طيب كل كويس علشان كلابيز من اجل التغير

..........tahayo2at said...

يااااااه

معقولة لسة ما حدش رد

الظاهر كله ملهي في اللحمة

كل سنة و انت طيب يا باشا و ان شاء الله الجراحة تعدي هي كمان على خير

(هي كمان دي)
تديك شعور ان في حاجة تانية عدت على خير

المهم ان التدوينة رائعة كالمعتاد لدرجة انها بقت من اهم فقرات يومي

و ربنا يرزقنا الحج اللي بقى يتكلف ثمن عربية

و نطلع سوى احنا و الحاج الصباحي
(لزوم قراءة الكف للحجاج)
و فضيلة المرشد مفيد شهاب

spellz said...

عجبنى اوى الكاريكاتور فكرنى ببلوج كنت قريته كدة عن وسائل المواصلات و قد ايه هى آمنة.

كل عام وانت بخير

ROMIL said...

ازيك يا ميجور
كل سنه وانت بالف خير
حلو قوي الحج الخواجه
ربنا ينولهالك

ROMIL

لحظة صدق said...

اهلا
كل سنة و انت طيب
ازيك يا د.زنجولا
انا بجد قريت كله كويس قوى بس عارف انا بقيت اخاف افتح مدونتك عشان ما عادش فيها اى حاجة مفرحة
ايه الكآبة دى و الناس دول
و بعدين مش كل الناس شافت روبى و صدام و الحاجات دى فى ناس نامت من البرد و ناس خرجت تعيد ف الشمس
انا مش قصدى ان كلامك مش صح بس عشان خاطرى ابقى اعمل مكس
عشان المكتئبين اللى زى حالاتى
المشكلة بقى ان انا كمان ماكنتش هاعلق بس كنت عاوزة اقوللك ان ...
هو الدكتور ده لسة بيحكى حكاية الدكتور الأجنبى
يا سبحان الله انا باسمعها من ناس اكبر منك بييجى 5 سنين دلوقت كان حاكيهالهم
مش عارفة انا حاسة ان تعليقى رخم قوى بس يالا توكلنا على الله

Unknown said...

ازيك يا باشا
بصراحة اول مرة
احط تعليق هنا
الموضوع جامد جدا
وعجبنى اول الكاريكاتير اللى فى الاخر
هو دة امان المواصلات
هيا دى الخدمات ولا بلاش
امال اية يعنى
هايبقى موت وجهنم كمان
ربنا يخليهم لنا

No Fear said...

السلام عليكم
أحلي ما في البوست الحج سليمان الواحد حس أنه يعرفه
و الناس التانية الواحد بيدعي أنه ميعرفهاش أصلا

tota said...

زنجولا
انا قريت البوست ده مرتين وكل لما اعلق السيرفر يعمل واجب جميل جدا لدرجة انى اتعقدت وقررت مش هعلق

الصباحى ده حدث تاريخى فى مصر لابد من الاحتفاظ به مع الحفريات فى المتاحف هو وفكره مع بعض ممنوع الفصل

الزجل جميل طبعا كعادتك

اما خبر الحج مفيد
يااااه ربنا كتبهاله يا سلام يارب واحنا كمان ربنا يكتبهالنا بس مش واحنا عندنا فصام

تحياتى