2006/07/23

الصوره .. تهز جبال


الحقيقة انا كان نفسي اخد اجازه من النت والكتابه شوية .. الواحد دمه اتحرق كتير من حاجات كتير .. لكن للأسف شفت صوره النهارده حرقت دمي .. الصوره ممكن تكون قديمه لكن انا اول مرة أشوفها .. الصوره دي هيه جيش اسرائيل .. اللي احنا خايفين منه النهارده .. و قاعدين كاشين في بيوتنا زي الفراخ .. الصوره دي بتاعت جيش اسرائيل اللي خلى حكامنا العرب يعتبوا على حزب الله .. و يقفوا مع اسرائيل .. الصوره دي بتاعت جيش اسرائيل اللي كل قوته و قدرته هي انه يستقوى على الاطفال و الستات .. صوره معبره جدا .. هقولك معبره علشان الجرمأ ده كله ماسك عيل صغير و ماشي فرحان كأنه دخل القاهره .. الصوره معبره لأن الطفل اللي المفروض اطفال في سنه يكونوا بيلعبوا في الشارع او في النادي .. ماسكينه عساكر جيش .. و مرعوب .. ومع كده محدش فينا بيهتم .. و كل واحد في حاله .. كأن قدر الحرب على فلسطين واجب .. و تخيلت لو الظروف دي عندنا في مصر .. واحنا اللي محتلين .. اكيد كنت هتمنى لو الدول العربيه تقف معانا .. لكن بصراحه .. اقسى شيء ان الدول العربيه تكون كمان ضدك .. متهيألي طعمها مر جدا .. لواحد كل امله كلمه تطيب خاطره .. بعد ما اتعود يعيش تحت اصوات المدافع والطائرات والدبابات .. و بقت فكرة بوكيه الورد اياه اللي بنبعته في كل مناسبه .. فكره تافهه جدا
املي ان اللي بيحصل النهارده .. يدينا احنا امل .. حزب الله .. لو كان حتى مدعوم من الجن الازرق .. فهو لسه بيقاتل .. حزب الله .. الحركه العسكريه العشوائيه .. خلت اسرائيل تستدعي الاحتياطي .. خلت اسرائيل تطلب سلاح من امريكا .. خلت اسرائيل بتلف حوالين نفسها .. ده حزب الله يا جماعه .. اللي محدش كان سامع صوته .. لكن لما صوته علي .. بقه اعلى من اصوات الكل .. من اول الساسه العرب اللي بيهللو لأسرائيل .. لحد الاخوه اللي بيلومو حزب الله النهارده على معركته
كلمه أخيره .. للناس اللي بتقول الحرب دمار و خراب .. ياريت بس لو فكرنا في نفسنا شويه .. شويه صغيرين .. و فكرنا فالناس اللي قبلنا .. صبر الله لما نفذ على الناس دي كانت النتيجه امم ابيدت .. بحجاره .. بعواصف .. بجراد .. امم بحالها ازيلت من على وجه الارض .. و احنا النهارده مش احسن حال منهم .. يعني يا جماعه لما النهارده نقول لأ لاسرائيل و تكون النتيجه مثلا خراب مصر و لبنان و سوريا .. بس في الوقت نفسه ازاله اسرائيل .. يبقى هنرجع نعمر بلدنا احنا او اللي ورانا .. هيعمروها و راسهم مرفوعه .. فخورين ببلدهم و بأنتمائهم ... انما لو استنينا شويه كمان .. و غضب ربنا اذن عليها .. هتكون النتيجه اننا تخلفنا 100 سنه ورا .. و همه لسه بيتقدمووا .. و هنرجع برضه . احنا او اللي ورانا نبني بلدنا دي .. بس روسنا في الارض .. و مغطيها الطين .. و اعتقد ان صور تسونامي مش بعيده عننا .. ولا إيه

4 comments:

Nouran said...

شكرنا لتذكيرنا بكل هذا وزيادة الاكتئاب علينا

شفت الاهلي كسب ف ماتش السوبر :) روح عند رضوى وقولها مبروك :)

BeeBee said...

The Arabs... The governments, kings, and governers are blinding themsleves from the truth... Will they ever open their eyes to see what's really going on" An American plan for a "New Middle East"... Hello! Did we complain??

Anonymous said...

Greets to the webmaster of this wonderful site! Keep up the good work. Thanks.
»

هدهد said...

تعرف

صدفه لقيت نفسى بدور على كلمه البيضه

ولقتنى دخلت مدونتك

ولقتنى قريت

وعجبنى جدا

واثر فى اوى

تحياتى

يا اكثر من تعرف --- نفسك