2006/07/19

يا راجل .. ده كلام

الرئيس مبارك في تصريحات لصحيفة الوطني اليوم : نشاط المقاومة الفلسطينية و اللبنانيه لا يحقق سوى مكاسب محدودة .. و الشعب هو الذي يدفع الثمن
لو كنت حاضرا في المؤتمر الصحفي الذي ألقى فيه الرئيس هذه الدرر .. لوقفت .. و قلت بعلو صوتي : لا فض فوك يا ريس .. ولكنت قلت له ( ولاحظ انني اتكلم باللغة الفصحى ) .. أن الاحصاءات تقول ان فلسطين تفقد شهريا ما بين 50 إلى 250 شهيدا .. بينما تفقد اسرائيل شهريا ما بين 1 إلى 5 قتلى .. إذن فكلام سيادتك صحيح .. و أنت العالم ببواطن الامور .. و إلى الامام يا ريس ... و أقوم الآن بمغادرة المكان متوجها إلى منزلي .. إلى حيث تنتظرني حلة المكرونه على النار .. و إلى حيث يجلس أهلي بانتظاري .. و إلى حيث كتبي .. و امتحاناتي .. و اناس احبهم و يحبونني .. إلى حيث عالمي .. ربما تعلمون الآن لماذا قلت .. لا فض فوك
انا دلوقتي على مكتبي .. ( يبقى نتكلم بالعاميه ) .. وكلام الريس لسه بيرن في وداني .. ولي تعليق بسيط عليه .. برغم خبرة سيادته الواسعه و الكبيره في الامور السياسيه العميقه .. احب اقوله ان المكاسب يا ريس لا تقاس بالماديات فقط .. كون عدد قتلى اسرائيل قليل جدا مقارنه بشهداء فلسطين اللي بيموتوا نتيجه الاعتداءات الصهيونيه او العمليات الفدائيه .. ف في النهايه .. الفلسطينين من حقهم الاحساس بالوجود .. الاحساس بقيمه الحياه .. بوجود مقاومه .. بوجود رفض ايجابي للواقع اللي فرض عليهم يكونوا اسرى و عبيد في ارضهم .. من حق الفلسطيني انه يقول لأ .. من حقه انه يعرف ان في ناس بتخاف عليه و بتحاول تاخد له حقه .. حتى لو كانت النتيجه غير مرضيه .. لكن المحاولات موجوده .. من حقه يحس .. و من حق اولاده يتأكدوا ان اسرائيل مش بعبع .. لازم يكبروا على صورة اسرائيل اللي بتتهز كل فتره بضربة قنبلة او انفجار حزام ناسف .. علشان يفكروا دايما .. ليه واحد قتل نفسه في الناس دي .. يفكروا ليه الناس دي بتحارب .. ويعرفوا ويتأكدوا ان اسرائيل ليست قوة مستحيله .. وانه ممكن في يوم من الايام تهزم على ايد واحد منهم .. يبقى من حق الشعب انه يرفض .. و يقاوم .. باسلوبه و طريقته .. وفي النهايه المكاسب موجوده يا ريس .. و اسمحلي انقل لسيادتك كلام سمعته من شخص اعرفه .. اتكلم بنفس مبدأ المكاسب المحدوده .. و قال ان ضربة اكتوبر اللي سيادتك قدتها واللي احنا بنهلل ليها ليل ونهار .. و اللي قادت سيادتك الى حكم مصر .. هي مكسب محدود .. استردت بيه مصر ارضها المغتصبه .. يعني لا احنا فتحنا عكا .. و لا حررنا بلاد المسلمين .. ولا بسطنا نفوذنا على الدول المجاورة .. حيالله حته ارض بتاعتنا كانت متاخده و رجعناها .. اعتقد ان في غير سيادتك كتير بيفكروا بمبدأ المكاسب المحدوده
نيجي بقه للحكمه اللي بتخر من التصريح .. في كلام سيادته عن الشعب .. والحقيقه انا احترت ابدأ منين ولا منين .. من مقارنه الشعب اللبناني او الفلسطيني بالمصري .. ولا من فكرة طرح الشعب كنقطه نقاش .. هحاول اتكلم في الاتنين .. يعني .. الشعب المصري والحمدلله .. يعيش في ظل حكومه مبارك .. هل حالنا افضل من حال هؤلاء في لبنان او فلسطين .. اعتقد انه مش موضوع نقاش دلوقتي .. لكن كله عارف احنا عايشين فين .. و القمع شكله ايه .. و العيش و العيشه واللي عايشنها .. وسلامات لأم حسن ... اما النقطه التانيه و الخاصه بذكر الشعب كمثال على محدودية المقاومه دي .. فأحب اسال فخامة الرئيس سؤال .. هو الشعب اللبناني او الفلسطيني اشتكالك ؟؟ .. حد قالك سلفني فلوس .. ولا حد طلب منك انك تدعمهم عسكريا او ماديا .. بلاش .. حد قالك انك مكشوف عنك الحجاب فياريت تدعيلنا دعوتين حلوين من بؤك ساعه عصريه يقوم ربنا سبحانه وتعالى يستجيب لدعواتك و يحرر القدس .. انا نفسي افهم .. مين قالك ان الشعوب دي هيه اللي بتدفع الثمن .. مين قالك ان الناس دي مش نفسها تموت علشان خاطر دقيقه تشوف فيها اسرائيل تحت النار .. مين قالك ان الناس دي مش مستعديه تعيش في معسكرات ايواء .. علشان بلدها يكون ليها موقف .. ليه فاكرين ان كل الشعوب زي شعوب مارينا اللي بتشوفوها .. عايزين ينزلوا البسين .. و ياكلو السيمون فيميه .. و يشربوا شامبانيا من النوع الفاخر .. محدش قال لسيادتك ان في ناس بتضحك و هيه عايشه في الطريق .. على الارصفه .. لأنها سمعه صوت صواريخ حزب الله و هيه رايحه ارض اسرائيل .. عمق الارض الاسرائيلية .. محدش قال لسيادتك ان في ناس بتطلع تهتف باسم حسن نصر الله .. برغم انها مصابه و حالتهم تصعب على الكافر .. محدش قال لفخامتك ان في ناس اشترت جنة ربنا .. بجنه الارض
سيدي الرئيس .. قالو ان الصمت احيانا ابلغ من الكلام .. ربما كان صمتكم مع نظرة الحنيه الشهيره في ملامحكم كافيه لنقل تعاطف الشعب المصري .. المتعاطف فعلا .. مع لبنان و فلسطين .. لكنكم آثرتم الحديث .. و لا أعلم اي مستشار ذلك الذي نصح سيادتكم بمثل هذه المقوله الخالده .. برغم ان السعودية كانت قد اخطأت نفس الخطأ منذ أيام .. و رأيتم رد الفعل عربيا و اسلاميا .. فلماذا هذا الذكاء السياسي من فخامتكم .. سيدي الرئيس اسمح لي اقولك .. يا راجل .. ده كلام

No comments: